Mga anunsyo sa kalagitnaan ng kurso

Mga katoto:

Kumusta na kayo? Nawa’y lahat tayo, sampu ng ating mga pamilya at mahal sa buhay ay ligtas sa kasalukuyang salot na COVID-19. Nawa’y makaraos tayo sa mga hamon na hatid ng pag-iingat laban sa sakuna.

Maraming salamat sa inyong sumusubaybay sa blog na ito at nagpapadala sa akin ng talaarawan. Ganito muna magpapatuloy ang ating kurso sa ngayon. Huwag mag-atubiling magpaskil ng komento dito o magpadala ng email tungkol sa anuman.

Ilang mga pagbabago sa mga hinihiling ng kurso natin:

1. Hindi na matutuloy ang pasulat na pagsusulit. Tatanggalin na ito sa mga hinihiling ng ating kurso.

2. Nakaatas pa rin sa inyo ang pagsulat ng mapagmuning papel. Kung makababalik tayo sa silid-aralan sa Abril, ilalagay natin ang huling araw ng pagpasa isang linggo mula sa pagbabalik muli ng klase. Para sa mga magbabalak magpasa ng papel sa orihinal nitong patay-guhit (deadline… hehe) maaaring magpasa nito sa pamamagitan ng email. Hindi ito ipinipilit at boluntaryong maaaring gawin. Ang haba ng papel ay 600-950 salita. Ang file name ng inyong ipapasa ay ang inyong ID number at ipasa ito bilang attachment sa dalawang anyo: isang *.doc at isang *.pdf. Sa mga magpapasa ng papel bago lumipas ang 3 Abril, lalagyan ko ng mga komento ang papel at bibigyan ng pansamantalang marka at makikita niyo agad ang mga ito pagbalik muli ng klase. Maari niyo aregluhin ang papel at ipasa muli matapos ang isang linggo. Kung hindi kayo magpapasa muli, magiging opisyal na ang pansamantalang marka.

3. May iaatas ako sa inyong proyekto na kapalit ng pangkatang ulat. Maghintay ng anunsyo para sa mga detalye.

4. Hintayin din natin ang mga mangyayari sa susunod na buwan upang makita kung paano natin gagawin ang huling pagsusulit sa Mayo.

Samakatwid, tatlo na lamang ang mga hinihiling ng kurso at magkakaroon ang mga ito ng binagong timbang/bigat:

A. Mapagmuning papel 35% ng huling marka

B. Proyekto: 30% ng huling marka

C. Huling pagsusulit 35% ng huling marka

Maaari pang mabago ang mga ito kaya’t nais ko rin marinig ang inyong mga reaksyon, muni, at mungkahi tungkol sa mga ito.

Maraming salamat sa inyong pasensya at pagsubaybay.