Daloy ng kurso

Mga katoto:

Ayon sa ating mga silabus, matapos basahin at talakayin ng Ph11.04 ang “1 Yugto: Meron” at matapos basahin at talakayin naman ng Ph102 ang “6 Yugto: Analogia, magkakasabay na ang dalawang kurso sa pagbasa at pagtalakay ng “7 Yugto: Agham at Meron.” Dito na tayo tutuloy ngayon.

Sa mga humiling ng pdf na kopya ng ating teksto ngunit hindi pa ito natatanggap, pasensya na. Mag-email kayo muli at ipadadala ko sa inyo.

Kung taglay na ninyo ang kopya ninyo ng teksto, magbasa at magmuni-muni na tayo.

Agham at Meron:

Ang agham ang isa sa mga pinakamaimpluwensyang larangan ng kasalukuyang daigdig. Imposibleng maisip ang kalagayan natin nang walang anumang kinalaman sa agham at sa mga bunga nito: teknolohiya. Malamang dahil sa pamamayani ng agham sa pagpapatunay at pagpapaliwanag ng maraming mga bagay, nakumbinsi na ang marami sa atin na naghahatid sa atin ng katotohanan ang agham. At dahil dito, nagdudulot ito ng hidwaan sa pagitan ng agham at ng iba pang mga larangang naghahatid ng katotohanan; pangunahin sa mga ito ang relihiyon. May tunay bang hidwaan sa isa’t isa ang iba’t ibang larangang ito?

Upang tunay na maharap at masagot ang tanong na ito, malaking tulong kung uunawain muna natin ang agham. Ano ba talaga ito? Paano ba talaga ang kilos ng larangang ito? Ano ang kalagayan nito sa harap ng meron?

Ngunit, napakadambuhalang larangan ang agham kaya’t makatutulong kung magsisimula muna tayo sa mga pundasyon o ugat nito. Magsimula tayo sa payak bago tayo tumungo sa masalimuot. Wika nga ni Padre Ferriols: “pati ang eroplano, kailangan muna gumapang sa lupa para ito ay makalipad.”

Ito ang dahilan kung bakit nagsisimula ang teksto sa matematika. Tatanungin muna natin kung ano ang kalagayan ng matematika sa harap ng meron. Upang magawa ito, tinalakay ni Padre Ferriols ang dalawa sa pinakakilalang sanga ng matematika: ang aritmetika at ang heometriya.

Pero bago tayo magpatuloy, manatili muna tayo sa payak na usapan. Kaya mo bang sabihin ang “matematika?” Bakit ko itinatanong? Ito’y dahil madalas kong marinig sa bibig ng mga estudyante ang salitang “matika.” Wala pong ganyang salita at wala ding gawaing “pagmamatika.” Kaya’t bago tayo magsimula, sanayin muna natin ang ating mga dilang sabihin: “matematika.” Sabihin mo muna ng mabagal “ma---te---ma---ti---ka.” At hayaang mabagal na gumulong sa dila ang mg pantig hanggang sa masanay ang dila at tunay mo nang masabi: “matematika,” at magawa ang “pagmamatematika.”

Handa na ka? Padayon ra ta.